Gazetarja nxjerr direkt në transmetim hashashin. Mbërrin policia në televizion

Në përfundim të procedurave nga ana e Policisë së Shtetit, drejtuesja e emisionit “Studio e Hapur” në News24, është prononcuar në lidhje me atë që ndodhi pas emisionit të djeshëm ku u fol për kanabisin. Eni Vasili u shpreh se ka firmosur një procesverbal dhe ka lënë kontakte për t’iu përgjigjur pyetjeve nëse do të ketë keqkuptime. Gazetarja gjithashtu thekson se e prisnin një reagim të Policisë së Shtetit, pasi e kishin marr parasysh të ndodhte një gjë e tillë.

“Besoj se procedura ishte diçka normale dhe janë në dispozicion të autoriteteve për të dëshmuar. Fakti që është kaq e thjeshtë që të mbërrijë në emision një degë kanabisi tregon se sa shqetësuese është ky fenomen”, ka thënë Vasili.

Intervista

Çfarë ndodhi, pse erdhi policia?

U lajmëruam që kishin ardhur forcat e antidrogës, që kishin për qëllim sekuestrimin e bimës që e transmetuam për dy orë në emision. Kjo ishte një proçedurë normale, ne kishim parashikuar ta digjnim ose ta depozitonim vetë në polici. Erdhën qetësisht e sekuestruan bimën me mirësjellje. Ishin diku 2 apo 3 oficerë.

Unë firmosa këtë procesverbal dhe lashë kontakte për çdo paqartësi që të kenë ata nevojë. Besoj që kjo është një procedurë normale. Është e rrallë të transmetohet një bimë e tillë por ajo u përdor për të simbolizuar debatin e madh që po bëhet për të gjitha dëmet që po sjell në ekonomi por edhe imazhit të Shqipërisë kudo në botë, imazhi i një vendi që mbillet dhe trafikohet në masë kanabisi. Ishin dy orë të nxehta me debat, ishte mjaft interesant se si u përplasën dy deputetët, edhe njëherë tjetër përfaqësues të politikës bien në të njëjtën grackë, i drejtojnë gishtin njëri¬tjetrit. Tonalitetet e larta por edhe analiza e detajuar e kolegëve Hoxha e Lala demonstruan se sa sensitive është kjo temë. Këtë e dëshmoi audienca dhe mesazhet në Facebook. Mendoj që procedura e policisë ishte normale. Nuk dua të jap shpjegime se si ka mbërritur kjo degë në studio. Edhe fakti që mbërrin është shqetësuese, por një gazetar nuk i tregon burimet e tij.

E firmosët vetëm ju procesverbalin?

Po m’u kërkua ta firmos në prani të drejtorit të Përgjithshëm në News 24, Andi Tela.

Si u sollën policët?

Në fillim kërkuan që ne të ishim vetëm, ne insistuam që të ishim me kamerat tona, ndaj kemi edhe mundësinë e këtyre pamjeve. Kur dola nga emisioni forcat e policisë kishin mbërritur. Në dalje i kemi takuar, të gjithë kanë qenë aty edhe deputetët Dogjani e Ndreu.

Kanë pranuar që të ishin edhe kamerat?

Po kanë pranuar… Nuk di me çfarë kanë ardhur policët, nuk di më detaje.

http://www.dailymotion.com/video/x4tzmj1_eni-vasili_news#tab_embed