Gjen kohën dhe pas një jave ministrja shpreh ngushëllimet për vrasjen e Mateos

Ministrja e Shtetit për Rininë dhe Fëmijët, Bora Muzhaqi e cila është komentuar shpesh për qëndrimet dhe të folurit në publik, më në fund e ka gjetur kohën për të komentuar vrasjen makabre të 8-vjeçarit Mateo.

Para një jave kur ndodhi ngjarja, ajo refuzoi për të dhënë një qëndrim, duke thënë se ”s’kam kohë”. Teksa u ka shprehur familjarëve ngushëllime, ministrja nga Korça tha se uron që ngjarje të tilla të mos ndodhin më në vend.

”Edhe pjesa e fëmijëve është shumë e rëndësishme për mua, e para ndjesë se të rreh zemra kur flet për ngjarje të rënda, duhet t’i shpreh ngushëllimet e mia familjes dhe kuptoj se kjo është pjesa më e rëndësishme që ne të gjithë duhet ta themi për momentin. Për sa i përket politikave apo gjërave që duhet të bëjmë për këtë fushë është ndoshta jo momenti i duhur për të folur, kjo s’do të thotë se s’po merremi apo angazhohemi aktivisht. Do kohën e vet për të arritur në konsensus dhe uroj që ngjarje të tilla mos ndodhin në Shqipëri”.