Gjergj Luca për Mediaset: Amo la verita! Amo Giorgia Meloni!

Albert Vataj

Pikërisht sot, kur në portin e Shëngjinit mbërrin anija e parë me 16 emigrantë që kanë ardhur nga Italia për t’u akomoduar në kampet e ngritura në vendin tone, pjesë e implementimi të një projekti të qeverisë shqiptare dhe asaj italiane, pikërisht sot Mediaset, nuk mund të mos e përfshijë në kronikat e saj, “Trattoria Meloni” dhe sipërmarrësin shqiptar të ideve unike, mirënjohjes emblematike, Gjergj Luca.

“Trattoria Meloni”, restoranti i Gjergj Lucës në Shëngjin, e ka tejkaluar thjeshtë një njësi shërbimi të produkteve të detit. Ajo është një shtëpi e mikpritjes së shqiptarëve për ata që vijnë për të zbuluar këtë befasi shqiptarë, për median në veçanti që e konsiderojnë atë si një hajmali e marrëveshje së qeveris shqiptare dhe asaj italiane, për akomodimin e emigrantëve në qendrat pritëse, në Shëngjin dhe në Gjadër, por edhe si shprehje e mirënjohëses që biznesmeni nuk kursehet për Giorgia Melonin, e cila bëri realitet marrëveshjen për pensionet për emigrantët shqiptarë.

“Është e lehtë ta shash e ta mallkosh atdheun në sy të botës por është më e vështirë ta mbrosh me punë e me sakrifica . Ndaj unë personalisht dhe kompania Rozafa pavarësisht kostos që marrim nuk do rreshtim që me punën tonë të jemi imazh i mirë i këtij vendi që tregon edhe mirënjohje për miqtë e mirë përtej Adriatikut. Të thuash faleminderit është pak!”

Mediaset është në aradhen e gjatë të mediave të huaja, të cilat kanë përcjellë “Trattoria Meloni”, si një zbulim, si një risi, e cila e pagjasë, është një nga restorantet më unike, jo tamam dedikuar kryeministres italiane, se sa vetë popullit italian, që u bë streha dhe mikpritja e mijëra shqiptarëve që kapërcyen Adriatikun për një jetë më të mirë, në tentativë për t’i shpëtuar diktaturës dhe varfërisë së skajshme ku ndodhej vendi ynë.