Gjergj Luca shtron iftar në Natën e Kadrit për punonjësit e Rozafës në Prrenjas

Gjergj Luca, edhe pse i besimit katolik, ka dëshmuar me vepra harmoninë dhe bashkëjetesën fetare, duke qenë pranë punonjësve të tij jo vetëm për të ndarë sfidat e përditshmërisë, por edhe për të festuar së bashku.

Ndryshe nga shumë sipërmarrës të tjerë, ai tregohet i kujdesshëm që të jetë gjithnjë afër atyre që me punën dhe përkushtimin e tyre janë shtylla kryesore e suksesit të kompanisë “Rozafa”. Në këtë frymë vlerësimi dhe mirënjohjeje, ai ka zgjedhur të festojë Natën e Kadrit me punonjësit e tij në Prrenjas, në njërën prej fabrikave të përpunimit të peshkut, duke ndarë me ta një moment reflektimi dhe bashkimi shpirtëror.

“Nata e Kadrit më sjell kujtimet e bukura të fëmijërisë sime, që nisin me këshillat e gjyshes dhe vazhdojnë edhe sot me respektin për punonjësit dhe miqtë e mi… Bekuar qofshi të gjithë dhe sa më shumë paqe në shpirtrat dhe mendjet tona!”, shkruan Luca në postimin e tij, teksa shpërndan edhe një video ku uron agjërim të lehtë për të gjithë besimtarët myslimanë.

Në këtë mbrëmje të shenjtë, ai ndan gjithashtu një sekret familjar tejet domethënës: lidhjen shpirtërore që ai ka krijuar me këtë natë falë gjyshes së tij, e cila e ka udhëzuar që fëmijë për vlerën e sakrificës dhe përkushtimit. Me një emocion të veçantë, ai rrëfen se që në moshën 5-vjeçare ai e ka agjëruar këtë natë të madhe.

Përfshirja e një sipërmarrësi në këto momente të rëndësishme është një dëshmi e vlerësimit të tij të thellë për punonjësit dhe për bashkëjetesën harmonike ndërfetare. Ky gjest nuk është vetëm një shprehje mirënjohjeje ndaj kontributit të tyre, por edhe një shembull i fortë i solidaritetit, respektit dhe humanizmit, që duhet të frymëzojë shoqërinë tonë.

Albert Vataj