Gjiknuri: Mandatin e ardhshëm do të zgjidhet përfundimisht çështja e pronësisë mbi tokat bujqësore

Drejtuesi politik i Partisë Socialiste për Qarkun e Vlorës Damian Gjiknuri ka zhvilluar një takim me fermerët  për zhvillimin e bujqësisë në Tragjas.

Në këtë takim kanë marrë pjesë edhe kryebashkiaku Dritan Leli, nënkryetarja Aulona Veizi dhe kreu i PS lokale Anduel Tahiraj.

Gjiknuri u ndal tek mbajtja e premtimit për naftën me kosto të lirë për bujqësinë, si dhe shtoi se mandatin e ardhshëm do të zgjidhet përfundimisht çështja e pronësisë mbi tokat bujqësore.

Gjiknuri: Nafta për bujqësinë ka qenë një kërkesë e kahershme e fermerëve dhe ka nisur të realizohet. Ministria e Bujqësisë ka krijuar të gjitha lehtësirat për fermerët që të mund të përfitojnë naftën me kosto të ulët duke rritur dhe fitimin e tyre. Eksportet bujqësore sa vijnë e po rriten ashtu sikurse edhe prodhimi bujqësor. Qeveria ka marrë përsipër të përmbyllë dhe një proces shumë të rëndësishëm siç është azhornimi i tokave. Jam i bindur se mandatin e ardhshëm do të zgjidhet përfundimisht çështja e pronësisë mbi tokat bujqësore.

Ky tren i nisur për zhvillimin e Vlorës nuk duam të ndalet. Që të ecim përpara duam partner, ju duam ju që e ndjeni që Shqipëria po ndryshon realisht dhe ka më shumë vëmendje ndaj jush. Duam partner ju që shikoni një qeveri që punon, që edhe kur nuk e bën gjithçka siç duhet mund të dëgjojë dhe reflektojë. Pala tjetër mund të premtojë shumë por nuk kanë dhënë prova. Ata vijnë pa dhënë asnjë provë në qeverisjen e tyre, vijnë të të mbushin mendjen se në 4 vitet e ardhshme do rrisin ekonominë 100% çka nuk ka asnjë mundësi të ndodhë. Thonë do dyfishojmë të ardhurat e njerëzve dhe histori të tjera si këto. Shikoni mirë se kush jua thotë dhe çfarë ka bërë në të kaluarën.