Gjiknuri vlerëson procesin e zgjedhjes së kryetarëve të rinj: Risi për ta kthyer PS në platformën më të madhe të ideve

Këtë të premte, Partia Socialiste shpalli emrat e përzgjedhur për të drejtuar këtë forcë politike në 61 bashkitë e vendit. Gjatë prezantimit të emrave, Sekretari i Përgjithshëm i PS, Damian Gjiknuri tha se metodologjia e re që ka përdorur PS-ja bën që kandidatët të marrin pëlqimin e anëtarësisë dhe të Asamblesë së partisë.

Po ashtu gjatë fjalës së tij, Gjiknuri nënvizoi edhe se nga ky proces PS-ja do të dalë më e fortë dhe më e organizuar.

“Kandidaturat zgjidhen duke reflektuar një raport, kësaj here është një proces që shkon përtej asaj, sepse kandidatët nuk filtrohen nga asnjë lloj strukture. Ata vetëshpallen aplikojnë, ballafaqohen, është marrë opinion i anëtarësisë, grupi i punës ka pasur një metodologji ku përfshihej dhe opinion i Asamblesë. Ky proces, Partia Socialiste do të dalë më e fortë dhe besoj se kemi zgjedhur kandidatët më të mirë. Çdo parti ka formën e saj të organizimit dhe çdo ndryshim ne e bëjmë është në funksion të forcimit të organizatës dhe në funksion të objektivave elektoralë”.