Gjykata vendos: Burg për kryetarin e “shoqatës” që punësonte prostituta

Vetëm 24 orë pas arrestimit ka dalë përpara togave të zeza në gjykatën e Tiranës i akuzuari për shfrytëzim prostitucioni pas denoncimit në emisionin “Fiks Fare”, Shpëtim Çekrezi.

Edhe pse 45-vjeçari nga Dardha e Librazhdit e hodhi poshtë akuzën, duke thënë se vajzat i çonte në Maqedoni për aktivitete artistike, kjo alibi nuk e bindi gjykatën. Ai kishte krijuar shoqatën artistike “Ferdinand Deda” në Tiranë, por, siç provohet nga materiali i “Fiks Fare”, maskonte aktivitetin kriminal të rekrutimit të vajzave për t’i shfrytëzuar si prostituta në Maqedoni, në lokale nate.

Gjykata e Tiranës vendosi ndaj Çekrezit masën e arrestit me burg, ndërsa i pandehuri pas kësaj ndryshoi strategji dhe kërkoi detyrim paraqitjeje duke paraqitur si shkak edhe gjendjen shëndetësore.