Grabitet pika e këmbimit valutor te “5 Maji”, autori hyri me armë zjarri në qendrën tregtare

Një pikë e këmbimit valutor është grabitur mëngjesin e sotëm në zonën e 5 Majit në Tiranë.

Sipas uniformave blu, autori, ende i paidentifikuar ka hyrë në subjekt që ndodhet në një qendër tregtare me armë zjarri (pistoletë) dhe vodhi një shumë parash.

Njoftimi i Policisë: 

Rreth orës 09:10, në rrugën “5 Maji”, një shtetas ende i paidentifikuar, nën kërcënimin e një sendi në dukje armë zjarri (pistoletë), ka vjedhur një shumë parash në një pikë këmbimi valutor brenda një qendre tregtare dhe është larguar nga vendi i ngjarjes.

Menjëherë pas marrjes së njoftimit, shërbimet e Policisë kanë shkuar në vendngjarje, kanë bërë rrethimin e zonës dhe kanë ngritur pika kontrolli në akset rrugore përreth.

Shërbimet e Policisë po krehin zonën dhe po vijojnë kontrollet me qëllim kapjen e autorit.

Ndërkohë, grupi hetimor po punon për sqarimin e plotë të rrethanave të rastit.