Gruaja ikën me të dashurin, i vë gjobë të shoqit
Një grua në Bilisht të Devollit e ka shfrenuar fantazinë, ka sajuar rrëmbimin e saj. Gruaja me inicialet A.Sh, është larguar nga banesa ku jetonte me të shoqin. Ajo ka ikur me të dashurin e vet, me inicialet A.K.
Por, ajo nuk e ka lënë me kaq. Bashkë me të dashurin e vet, i kanë vënë një gjobë prej 10 milion lekësh ishbashkëshortit të saj, me pretendimin se ajo ishte rrëmbyer. Ishbashkëshorti me inicialet P.Sh, është marrë në telefon nga i dashuri i gruas së vet. Ky i fundit i ka thënë se i ka rrëmbyer gruan.
Për këtë arsye, i ka kërkuar 10 milion lekë, në këmbim të lirimit të së shoqes. P.Sh kishte shitur një pronë dhe gruaja e tij kishte vënë në dijeni të dashurin, se ai e kishte një shumë të tillë. Por, plani i dy dashnorëve ka dështuar, pasi P.Sh pas kësaj telefonate, ka njoftuar policinë.
Pas disa hetimeve, dy dashnorët janë arrestuar në flagrancë dhe tashmë do të gjykohen në Gjykatën e Krimeve të Rënda.