Guvernatori Sejko: Pritet rritje e nivelit të papunësisë dhe kredive me probleme

Guvernatori i Bankës së Shqipërisë, Gent Sejko shprehet se pandemia e COVID-19 ka goditur fort ekonominë shqiptare dhe në muajt e mbetur të 2020 pritet sërish rënie.

Teksa ka raportuar punën e Bankës së Shqipërisë për vitin 2019 në Kuvend, Sejko theksoi po ashtu se papunësia pritet të shënojë një rritje, duke sjellë rënie të të ardhurve familjare dhe shtim të kredive me probleme në sektorin bankar.

“Pandemia COVID-19 kanë dhënë një goditje të fortë tek ekonomia e familjeve shqiptare gjatë tre muajve të fundit të vitit.

Ekonomia shqiptare pritet të shënojë një rënie gjatë vitit 2020, rënie që do të shoqërohet me rritje të numrit të papunësisë, rënie të të ardhurve familjare dhe me përkeqësim të situatës financiare të individëve dhe bizneseve dhe shtim të kredive me probleme në sektorin bankar.

Kjo goditje kërkoi një reagim të shpejtë dhe të gjithanshëm të autoriteteve publike si në planin shëndetësor, ekonomik dhe social.

Krahas masave lehtësuese fiskale Banka e Shqipërisë ndërmori një paketë të plotë masash për të siguruar likuiditetin e nevojshëm për sistemin bankar, për të nxitur kreditimin dhe për të kontrolluar kostot e shërbimit të borxhit.

Kjo paketë përfshin uljen në 0.5% të uljes së normës bazë të interesit dhe furnizimin e pakufizuar me likuiditet të sistemit bankar.

Lehtësimin e përkohshëm të rregulloreve bankare për të mundësuar shtyrjen e përkohshme të pagesës së kredisë të klientëve në përgjithësi dhe ristrukturimin konsensual të kredive për klientët me perspektiva solide biznesi duke ndihmuar financat e bizneseve për të rritur shanset e tyre për mbijetesë.

Eliminimin e kostove të pagesave elektronike në përgjigje të rritjes së kërkesës për këtë lloj aktiviteti.

Rritjen e kapaciteteve operacionale për të garantuar furnizimin e ekonomisë me para fizike kesh”, tha Sejko.