Halimi: U konstitua Këshilli Popullor, jo Këshilli Bashkiak i Tiranës!

Në një prononcim për mediat Prof. Asoc.Dr. Eltjon Halimi, Kryetar i Grupit të Këshilltarëve të LSI në Bashkinë e Tiranës tha mbledhja e sotme e Këshillit Bashkiak të Tiranës ishte një farsë.

Prononcimi i plotë i Eltjon Halimit:

Pas gati 30 viteve që shqiptarët fituan në Dhjetor 1990 të drejtën themelore në demokraci, atë të zgjedhjeve midis kandidaturave dhe programeve alternative, qytetarët e Tiranës u bënë dëshmimtarë të rilindjes të “Këshillave Popullorë” me të emëruar nga Partia në votime me rezultat 99.99%!
Farsa e sotme, e konstituimit të organit më përfaqësues të pushtetit vendor pluralist, Këshillit Bashkiak të Tiranës, fatkeqësisht i ngjante mbledhjeve moniste të Këshillave popullore me moton “të gjithë pushtetin sovjetëve”, duke dëshmuar se sa e vështirë është respektimi i vlerave dhe parimeve demokratike të garantuara në shoqëritë demokratike euro-antlantike ku aspirojmë të integrohemi.
Për Këshilltarët e LSI por edhe për shumicën e banorëve të Tiranës që refuzuan me mospjesëmarje farsën e 30 Qershorit, ky Këshill është nul, dhe ne nuk do njohim asnjë vendim të tij, deri në mbatjen e zgjedhjeve kushtetuese të 13 Tetorit në respekt te ligjeve dhe autonomisë vendore!