Harxhi: Ideja e shkëmbimit të territoreve, farë e mbjellë nga Thaçi dhe Vuçiç

E ftuar në emisionin ”Tempora” në ”RTV Or”a nga gazetarja Sonila Meço, ish-zëvëndës Ministrja e Integrimit Edit Harxhi, tha se ideja e shkëmbimit të territoreve midis Kosovës dhe Serbisë, ishte një farë e mbjellë nga Thaçi dhe Vuçiç, dhe më pas këtë ide e transferuan në Uashington.

Edit Harxhi: ”Ajo çfarë është më kryesore për mua është fakti që një herë e përgjithmonë i është dhënë fund idesë së ndarjes së Kosovës, këmbimit të territoreve. Për vetë faktit që ishte një ide që kishte gjenezën e saj në Ballkan, pikërisht nga liderët e Ballkanit. Megjithatë këtu janë involvuar edhe segmente të tjera në gjithë këtë histori. E para është deklarata e Grenell në lidhje me atë çfarë ai ka dëgjuar nga personazhet kryesore që do merrnin pjesë në takimin e Uashingtonit, që ideja e këmbimit të kufijve ka qenë e Bolton.”

”Pra ai në mënyrë të drejtpërdrejtë nuk thotë se ishte Bolton, por se e ka dëgjuar nga personazhet kryesore. Do të thotë që ata e kanë mbjellë vetë këtë farë dhe më pas e kanë transferuar në Uashington, duke përfshirë këtu edhe lobingjet e ndryshme. Janë bërë lobingje pa fund, janë hedhur para pafund në këtë proces dhe mendoj që kjo ka lidhje të drejpërdrejtë me dosjen dhe aktakuzën.”