Hasani në konferencë me Gërvallën: Sulmi në Banjskë akt terrorist, autorët të dalin para drejtësisë

Teksa ndodhet në një vizitë zyrtare në Kosovë në kuadër të një turi që po zhvillon edhe në Mal të Zi dhe RMV, ministri i Jashtëm Igli Hasani ka dalë në një konferencë për shtyp me homologen e Kosovës, Donika Gërvalla.

Gjatë fjalës së tij, Hasani tha se sulmi i 24 shtatorit në Banjskë ishte akt terrorist dhe se Shqipëria e ka dënuar ashpër.

Hasani shtoi se autorët duhet të dalin para drejtësisë sa më parë për të mos lejuar një përshkallëzim më tej të situatës.

“Vizita ime është pjesë e një turi, pas Kosovës në RMV dhe Malin e Zi. Turi ka për qëllim ndarjen e ideve për punën që duhet të bëjmë bashkë për të mirën e rajonit dhe qytetarëve tanë. Rajoni është duke kaluar një moment delikat. Siguria dhe stabilteti janë më të kërcënuara se sa në çdo moment tjetër gjatë dekadës së fundit. Kemi dënuar sulmin e 24 shtatorit. Ky sulm ishte një akt kriminal kundër stabilitetit pavarësisë ligjit dhe rendit të Kosovës. Autorët organizatorët duhet të mbajnë përgjegjësi dhe të dalin para drejtësisë sa më parë për të mos lejuar një përshkallëzim më tej të situatës”, tha Hasani.