Heroinë e kanabis në shtëpi, prangosen tre shqiptarë

Tre shqiptarë, dy burra e një grua, janë arrestuar nga karabinierët në Massa pasi janë kapur me 800 gramë heroinë, tre kile marijuanë e mbi 50 gramë hashash, gjithsej rreth katër kile substanca të ndaluara.

Shqiptarët nuk ishin nën vëzhgim dhe arrestimi i tyre ishte i rastësishëm, pasi karabinierët vunë re një person që doli nga pallati me pamje që ngjalli dyshime.

Kontrolli i kryer zbuloi një dozë kokainë që sapo e kishte blerë nga shqiptarët dhe atëherë karabinierët hynë në godinë, ku identifikuan apartamentin e shitësve të drogës, brenda të cilit u gjet droga e lartpërmendur.

Tre shqiptarët nuk kanë precedentë penalë, ndërkohë që droga e kapur është sasia më e madhe për këtë vit në Massa e Carrara.

Gjyqtari ka vendosur arrestin me burg për dy burrat, përgjegjës për drogën, ndërsa gruaja është vendosur në arrest shtëpie.