Homazhe lamtumire Doktor Florit, Alban Skënderaj: Boshllëku që la nuk do mbushet kurrë

Në një ceremoni të posaçme që nisi në orën 09.00 në ambientet e TVSH-së, zhvillohen homazhet në nder të këngëtarit rebel. Këngëtari Alban Skenderaj, pas homazheve e ngushëllimit të familjes ka thënë për mediat se boshllëku që la Flori nuk do mbushet dot kurrë.

“Është një humbje shumë e madhe për familjen, miqtë dhe muzikën. Flori ishte një talent i rrallë dhe njerëzit si ai janë paketë, artist, tekstshkrues shumë i mirë, këngëtar shumë i mirë, i fuqishëm, energjik, pozitiv, me dashuri të madhe për jetën. Është e vështirë të gjesh fjalët për këtë humbje, një boshllëk e mungesë që nuk do mbushet ndonjëherë”- tha ai.

Arkëmorti është mbajtur nga miqtë e tij të ngushtë. Brenda ambienteve është vënë fillimisht muzikë funebre, e më pas holli ka jehuar nga këngët e kënduara nga vetë doktor Flori.

Homazhet janë planifikuar të zgjasin deri në orën 11.00, kohë kur kortezhi do të niset drejt Sharrës.