I dehur në timon, 43-vjeçari nga Tirana tenton të korruptojë policin

Një 43-vjeçar në Tiranë është vënë në pranga, pasi tentoi t’iu jepte ryshfet efektivëve të Policisë Rrugore.

Sipas uniformave blu, në rrugën “Isuf Elezi” është ndaluar drejtuesi i një automjeti, pasi po udhëtonte në mënyrë të çrregullt. Pasi iu bë testi rezultoi se shtetasi E. B. po drejtonte mjetin nën efektin e alkoolit në masën 1.10 mg/l testi i parë dhe 0.91 mg/l testi i dytë.

Teksa efektivët po kryenin veprimet policore, drejtuesi i mjetit iu ka ofruar ryshfet 10 euro, me qëllim shmangien e penalizmit për shkeljen e kryer. Në këto kushte është bërë arrestimi në flagrancë i shtetasit E. B., 43 vjeç, për veprat penale “Drejtimi i mjeteve në mënyrë të parregullt” dhe “Korrupsioni aktiv ndaj personave që ushtrojnë funksione publike”.