Ilir Beqaj: Opozita na provokoi me vota të pavlefshme në 30 qershor

Ish-ministri i Shëndetësisë, Ilir Beqaj deklaroi në “Ditari” në A2 CNN se mes votave të pavlefshme në zgjedhjet e 30 Qershorit, “një pjesë e tyre janë edhe vota të pilotuara nga opozita jashtëparlamentare”.

“Dyshoj se një pjesë e tyre janë edhe vota të pilotuara nga opozita jashtëparlamentare. Simpatizantë të saj kanë shkuar enkas për të nxjerrë vota të pavlefshme me dyshimin se ne gjatë numërimit nuk do t’i nxirrnim ato. Kanë dashur të na provokojnë për të thënë pastaj që ne i manipuluam”, deklaroi deputeti socialist.

Në lidhje me videon e publikuar nga Partia Demokratike, ku shihej një komisioner duke futur fletën e votimit në kuti, Beqaj theksoi se çdo indicie duhet hetuar.

“Personi çohet nga tavolina dhe fut fletën e tij. Ai nuk shkoi me tufë fletësh në kuti. Le të hetohet dhe pastaj, kush ka përgjegjësi, të marrë ndëshkimin sipas legjislacionit shqiptar për cenimin e zgjedhjeve”, theksoi Beqaj.