“Indrit, tregomë ç’i ka ndodhur Renit!” Nëna e të zhdukurit i lutet të burgosurit të përjetshëm

Që prej 29 qershorit të vitit 2014, asgjë nuk dihet për fatin e këngëtarit të tallavasë, i njohur si Reni i Elbasanit, i cili u zhduk në mënyrë misterioze pa lënë gjurmë. Nëna e tij, Silvana Hamza ka bërë një apel për 46-vjeçarin Indrit Shaqja, i cili dyshohet se mund të ketë lidhje me zhdukjen e Renatos. Në një intervistë në emisionin “Uniko” në Klan Plus, Silvana kërkon nga Indriti, që ai të tregojë të vërtetën se çfarë ndodhi me djalin e saj.

Apeli i saj:

”Mesazh për Indritin kam këtë që në qoftë se ai ka djalë vetë, në qoftë se ka vëlla, në qoftë se është prind, le ta tregojë të vërtetën e Renatos se unë nuk dua asgjë. Vetëm kaq dua nga ai. Se ai dënimin e ka marrë. Nuk ka pse dënohet më. Kaq dua prej Idritit, le të më thotë një të vërtetë për Renaton se po më qan shpirti. Le të mendojë si për djalin e vetë. Kaq dua prej Indritit, sepse atë Zoti e dënoi. Kaq dua.”

Më tej ajo tha se nuk ka besim fare tek shteti për çështjen e të birit, duke hedhur akuza të forta. Sipas saj, shteti ka fshirë çdo gjë dhe i ka lëshuar kriminelët që kanë lidhje me zhdukjen e të birit.

Ajo tha: “Shtetit nuk Ia fal kurrë. Shteti që e ka fshirë çdo gjë. Nuk mendoi, i lëshoi kriminelët. Unë tek shteti nuk kam besim fare”.

Kujtojmë këtu që 46-vjeçari Shaqja është dënuar nga gjykata me burgim të përjetshëm, pasi vrau dy kunatat, Elsa dhe Gjinovefa Vava, në shkurt të vitit 2014.