Ish-deputeti Noka: Pushteti kriminal kërcënon opozitën

Gjashtë ish-deputetë të PD-së, Flamur Noka, Enkelejd Alibeaj, Gent Strazimiri, Klevis Balliu, Xhemal Gjunkshi dhe Anton Frrokaj të cilët sipas Policisë së Shtetit u përfshinë në përplasje fizike me policët brenda drejtorisë së Policisë së Tiranës natën e 16 shkurtit, po tregojnë versionin e tyre të ngjarjes, në një konferencë për shtyp.

Ish-deputeti i PD-së, Flamur Noka tha se thjesht kishte ndërhyrë kur një polic i kishte futur thonjtë në fyt kolegut të tij Gent Strazimiri, ndërsa shtoi se pushteti i Edi Ramës po bën kërcënim politik ndaj ish- deputetëve opozitarë.

“Jemi në tentative kërcënimi politik të deputetëve të opozitës nga ana e pushtetit. Në rastin konkret, ne si deputetë opozitarë po bënim punën tona sipas Kushtetutës dhe ligjeve. Nuk ka bërë kurrë në demokraci që zyrtarët e policisë të dhunojnë deputetët në krye të detyrës, ky është rast i paprecedent. Prokuroria dhe policia politike e Edi Ramës vetëm dhunon deputetët opozitarë. Unë kam ndërhyrë, kur punonjësi i policisë i kishte futur thonjtë në fyt kolegut Strazimiri. Deputetët janë të paprekshëm në bazë të Kushtetutës. Unë largova një punonjës policie, punonjës i një bande, pasi dhunonte fizikisht një përfaqësues populli. Kjo është çështja për të cilën jemi proceduar”, tha Noka.