Ish-këshilltarët rrëfejnë njohjen dhe bashkëpunimin me Bujar Nishanin

Ish-ambasadori Flamur Gashi rrëfen se Bujar Nishanin e ka njohur në fillim të viteve 90’ kur ishte shef i Protokollit në Ministrinë e Mbrojtjes. Gashi thotë se atëherë Nishani ishte djalë i ri, elegant, tepër korrekt në punën e tij dhe jashtëzakonisht miqësor e paqësor. Ai ka qenë Këshilltar për 3 vite për çështjet e Rajonit dhe Diasporës dhe e quan veten fatlum që ka bashkëpunuar “me një burrë shteti si Bujar Nishani”.

Kurse Ledina Mandija, ish-zv/kryeministre, tregon po ashtu si është njohur me Nishanin dhe bashkëpunimet që ka pasur me të.

“Në fillim njohjen e kisha në distancë, nga persona që e kishin mik nga PD-ja dhe flisnin me superlativa për të. Në vitin 2010, Nishani, kur ishte Ministër Drejtësie, më ka komunikuar funksionin tim si avokate e Përgjithshme e Shtetit, në varësi të ministrit të drejtësisë”,-tha për ”Euronews Albania”.

Edhe kur ishte president, bashkëpunimi i tyre vijoi pasi Mandija u bë Këshilltare Ligjore e atëherë president, Nishanit. ”Kemi pasur një bashkëpunim të frytshëm dhe kemi bërë një punë shumë voluminoze”.