ISHP ndëshkon me gjobë fasoneri, kompani nafte dhe supermarkete

Inspektoriati Shtetëror Shëndetësor me grupet e tjera të Task-Forcës anti-COVID, kanë realizuar 1381 kontrolle dhe monitorime në 24 orët e fundit, rreth zbatimit të masave kundër koronavirusit.

Ministria e Shëndetësisë njofton se janë vendosur 11 masa administrative, ku 4 gjoba janë vendosur në fasoneri, kompani nafte dhe supermarkete, ndërsa 7 masa administrative për pezullim aktiviteti në institucione publike, market ushqimor, dyqan veshjesh dhe filial banke.

Ministria e Shëndetësisë dhe Mbrojtjes Sociale fton qytetarët të tregohen të kujdesshëm, duke respektuar vendimin për maskën e detyrueshme në ambientet e mbyllura.

Bizneset të zbatojnë me korrektësi protokollet e sigurisë në punë:

▪️Dezinfektoni ambientet;

▪️Kryeni ajrosjen rregullisht;

▪️Përdorni maska apo barriera mbrojtëse në çdo subjekt shërbimi për qytetarët.

Qytetarët të jenë të kujdesshëm në zbatimin e masave të vendosura:

▪️Mbani distancën;

▪️Vendoseni maskën;

▪️Ruani higjienën personale dhe kolektive.