Ja çfarë policësh politikë keni, zoti Çuçi! (FOTO)

Ministri Brendshëm, Bledi Çuçi erdhi me një deklaratë publike, ku ndër të tjera tha se policia nuk është dhe nuk do jetë partiake.
U pelqye si deklaratë me një dyshim se ndodhet në oborrin rilindas, por prapë njeriu shpreson.
Ndërkohë ka shume akuza nga opozita se policia vazhdon të jetë e dhunshme dhe krejtësisht politike. Por kur e provon vetë dhe je deshmitar në ngjarje nuk ka ministër që ta ndryshon mendjen.
Ja se ç’ndodhi mbrëmë rreth orës 20:00 te rruga Bilal Xhaferri, afër gjimnazit Petro Nini Luarasi.
Disa banorë të pallatit në hyrjen e rrugës pa krye të Bilal Xhaferrit kishin parkuar makinat e tyre private në sheshin dhe para godinës ku banojnë, si çdo natë. Pas vendosjes së tabelës për rezidentët, ata kanë të drejtë të kenë prioritetin e parkimit në raport me qytetarë të tjerë jorezidentë, të cilët parkojnë në atë zonë sepse shkojnë në lokalet e bukura të zonës.
Rreth orës 20:00, te ky pallat vijnë forca të shumta policie pasi i kishte lajmëruar dikush nga bizneset aty afër.
Policët e shtetit sikur të ishin roje private të biznesit konfliktohen me banorët e pallatit që kishin parkuar makinat dhe u vënë gjoba.
Banorët, dhe veçanërisht Lutfi Doga bën debat duke kundërshtuar vendosjen e gjobave sepse ishte e padrejtë.
Ata janë banorë rezidentë dhe në vend që policia të gjobiste apo largonte makinat e atyre qe nuk ishin banorë, fillon gjobat ndaj rezidentëve.
Debati arrin kulmin mes banorëve dhe policisë, e cila u shtu në numër, sikur të kishte ndonjë ndodhur skenë krimi!
Zoti Doga, banor i hershëm në këtë pallat i drejtohet policisë:
– E keni gabim të nderuar, pasi këtu banoj dhe nuk kam ku e parkoj makinën sepse këtu e kanë zënë vendin me forcë “të fortët” e Tiranës qe vijne nëpër kafenetë këtej!
– Kujt i flet ti ashtu!?- drejtohen i policët burrit të moshuar.
-Kam të drejten time! Gjobisni këta
që nuk janë rezidentë e jo mua që kam shtëpinë këtu!
– Ore do të marrim në polici po kundërshtove!- policët u turrën sikur të kishin renë në gjah për mbushje furgoni.
Në ketë moment banori Doga nxjerr celularin për ti bërë foto ngjarjes.
Ata e kapin me forcë.
– Do ju nxjerr te gazeta KOHA JONE!- dhe sa tha këtë fjale iu sulën policët gjithë inat.
– Te KOHA JONE!?- pyeten policët.
Dhe i vunë gjobën trefish në raport me banoret e tjerë.
Ja kjo është policia e shtetit, zoti Ministër!
Mjafton edhe një detaj për të krijuar tablonë!- thotë piktori Edi Rama.
Kjo është tabloja para fillimit të fushatës.
Për një fjalë qe tha ai, KOHA JONË, dhe që është banor i pallatit ku kishte parkuar, ai mori gjoben trefish të cilën me zor do ta paguajë kur të marrë pensionin, bashkë me ilaçet.