Jo mjekim me receta WhatsApp-i/Manastirliu: Rimbursim dy paketave për Covid-19 në banesë

Rimbursimi ambulantor për të sëmurët nga Covid-19 që trajtohen në banesë, do të lehtësojë kostot dhe do të disiplinojë mjekimin në stadin e lehtë dhe të mesëm. Kështu tha ministrja e Shëndetësisë, Ogerta Manastirliu gjatë konferencës për shtyp, teksa shtoi se kjo paketë është propozuar që të miratohet menjëherë. Manastirliu u bëri apel qytetarëve të lidhen me mjekët e familjes dhe të mos mjekohen me receta WhatsApp-i.

”Të dyja skemat e mjekimit janë pjesë e udhëzuesit të miratuar nga Komiteti Teknik i Ekspertëve. Mjeku i familjes e di kur trajtohen, si trajtohen, kur merret skema e parë e trajtimit, çfarë elementësh ka skema e parë apo e dytë, këtë e përcakton mjeku”, tha Manastirliu.

Teksa tha se këto paketa mbështetëse vijnë në momentin e duhur, nënvizoi se ”Paketa e rimbursimit për trajtimin ambulator në banesë të personave të testuar pozitiv me Sars-Cov-2 përbëhet nga dy skema trajtimi, në përputhje me formën e sëmundjes sipas udhëzuesit të miratuar nga Komiteti Teknik i Ekspertëve. Skema 1 e trajtimit e cila përfshin format e lehta të prekjes nga infeksioni i shkaktuar nga Sars-Cov-2. Skema 2 e trajtimit e cila përfshin format e moderuara të prekjes nga infeksioni i shkaktuar nga Sars-Cov. Kostoja vjetore parashikohet 1.2 miliard lekë në vit”, tha Manastirliu.