Kampi i refugjatëve në Shëngjin, ministri Tajani: Marrëveshja sipas rregullave të BE-së

Ministri i Jashtëm italian, Antonio Tajani thotë se marrëveshja që qeveria italiane nënshkroi me Tiranën për të ngritur qendra në Shqipëri për menaxhimin e emigrantëve nuk është e paligjshme.

“Marrëveshja e nënshkruar me shtetin shqiptar është në përputhje me të gjitha ligjet e BE-së. Është shumë e ndryshme nga marrëveshjet e tjera që janë arritur nga vendet e tjera. Ajo synon të sigurohet që personat që nuk kanë respektuar rregullat dhe nuk kanë të drejtë të hyjnë në Itali mund të kthehen në vendet e tyre të origjinës”, u tha Tajani gazetarëve në fund të një takimi të ministrave të jashtëm të G7 në Tokio.

Komisioni Evropian ka thënë se ka kërkuar më shumë informacion në lidhje me detajet e marrëveshjes. Të martën, kreu i Partisë Demokratike (PD) Elly Schlein tha se marrëveshja “duket në shkelje të hapur të ligjit ndërkombëtar dhe evropian”.