Kanabis dhe heroinë, dy të arrestuar në Krujë

Policia e Shtetit vijon me kontrollin e territorit sa i përket evidentimit dhe goditjes së veprimtarisë kriminale në fushën e narkotikëve.

Sipas njoftimit të uniformave blu, janë goditur dy raste në rrethin e Krujës ku janë sekuestruar 17 kg kanabis dhe një sasi heroine, ndërsa janë arrestuar dy shtetas.

“Specialistët për Hetimin e Krimeve në Komisariatin e Policisë Krujë, në vijim të veprimeve arrestuan në flagrancë shtetasit:

B. Z., 37 vjeç, banues në fshatin Luz, Fushë Krujë, pasi gjatë kontrollit të ushtruar në banesën e tij, u gjetën dhe u sekuestruan në cilësinë e provës rreth 14 kg lëndë narkotike cannabis sativa dhe disa bimë narkotike cannabis sativa.

V. U., 36 vjeçe, banuese në Tapizë, Krujë, pasi gjatë kontrollit të ushtruar në banesën e saj, u gjetën dhe u sekuestruan në cilësinë e provës materiale rreth 3 kg lëndë narkotike cannabis sativa, 15 gr. fara bime narkotike e dyshuar cannabis sativa dhe 435 gr. lëndë narkotike e dyshuar heroine”, thuhet në njoftimin e Policisë.