Kaos në burgje/ Tension në Peqin, Lezhë dhe Shkodër

Zbatimi i masave anticovid në burgjet e vendit ka ngjallur pakënaqësi të forta tek të burgosurit dhe të paraburgosurit. Ushqimi është refuzuar nga të dënuar në burgun e Peqinit dhe atë të Shënkollit në Lezhë.

Firmëtari i parë i peticionit drejtuar Ministrit të Drejtësisë, Drejtorisë së Burgjeve, Prokurorit të Përgjithshëm dhe për dijeni gjithë krerëve të shtetit është Verdi Morava. Familjarë e tij thanë menjëherë pas dërgimit të peticionit, institucioneve autoritetet e burgut e kanë mbyllur në izolim për 3 muaj, pa i dhënë asnjë shpjegim.

Në listën e kërkesave të të dënuarve është amnistia e përgjithshme, përcaktimi me vite i dënimit të përjetshëm me 20 vite, aplikimin e lirimit pas 3/5 të dënimit, reduktimin e kostove të telefonit, rregullimin me ligj të çmimeve në dyqanet brenda burgut, si edhe largimin e drejtorit të Përgjithshëm të Burgjeve.

Të dënuarit e burgut të Peqinit dhe të Shën Kollit nuk kanë pranuar të takojnë grupin e punës të dërguar nga Drejtoria e Përgjithshme e Burgjeve. Ata kanë marrë kontakt vetëm me përfaqësuesit e Avokatit të Popullit, të cilët kanë bërë një inspektim gjatë ditëve të fundit.