KAS rrëzon kërkesën e PD-së: Zgjedhjet në Tiranë nuk përsëriten

Komisioni i Ankimimeve dhe Sanksioneve ka rrëzuar kërkesat ankimore të paraqitura nga Partia Demokratike dhe Boiken Abazi i Lëvizjes Vetëvendosje për zgjedhjet në qarkun e Tiranës.

“Zgjedhjet në Tiranë nuk përsëriten”, ishte vendimi i KAS që u dha me shumicë votash, 3 pro dhe dy kundër.

Dy subjektet kërkuan shpalljen e pavlefshme të zgjedhjeve në Tiranë, por KAS rrëzoi këto kërkesa dhe la në fuqi rezultatin e vulosur nga KQZ ditë më parë.

Tashmë dy subjektet kanë të drejtë të dërgojnë çështjen në Kolegjin Zgjedhor me anë të një ankese.

“Pasi KAS u mblodh në dhomë këshillimi, bazuar në analizën e provave dhe fakteve me shumicë votash vendosi rrëzimin e kërkesës ankimore të paraqitur nga koalicioni PD-AN, rrëzimin e kërkesës ankimore nga kandidati z. Boiken Abazi, lënien në fuqi të vendimit të KQZ për miratimin e tabelës përmbledhëse për qarkun e Tiranës për subjektet zgjedhore dhe kandidatët për deputet në zgjedhjet e 25 prillit. Ky vendim hyn në fuqi. Kundër tij bëhet ankimi në Kolegjin Zgjedhor”, tha Ledio Braho.

Ankimimi për Elbasanin

Komisioni i Ankimimeve dhe Sanksioneve ka miratuar kërkesën e Lëvizjes Socialiste për Integrim dhe Partisë Demokratike, për të trajtuar ankimimet e tyre, për Qarkun e Elbasanit.

“KAS vendos pranimin e kërkesave, për të vazhduar trajtimin e ankimimeve”, u shpreh anëtari i KAS.

Partia Demokratike dhe Lëvizja Socialiste për Integrim ka ankimuar rezultatin e zgjedhjeve për 9 qarqet të vendit.

Deri më tani, janë shqyrtuar në KAS, ankimimet për qarqet e Durrësit, Beratit, Shkodrës, Tiranës dhe Vlorës, ndërsa deri më tani, nuk ka pasur ripërsëritje të zgjedhjesh apo ndryshim rezultati.