Këlliçi: Në 14 Maj fitorja e sigurtë

Kandidati i opozitës për Bashkinë Tiranë, Belind Këlliçi, zhvilloi ditën e sotme një bashkëbisedim me banorët e fshatit Zallherr të Tiranës.

Gjatë fjalës së tij, Këlliçi u shpreh se në 14 Maj fitorja e demokratëve është e sigurtë.

Sipas tij “qytetarët po numërojnë ditët dhe kanë mllef ndaj drejtuesit aktual të Bashkisë Tiranë. Erion Veliaj.

“Njerëzit po numërojnë ditët. Po numërojnë ditët. Është larg 14 Maji. Njerëzve u ka ardhur shpirti në majë të hundës, unë kam 1 muaj e gjysëm që jam 8 orë në ditë në ecje në qytet, në lagje, kudo. Njerëzit po shpërthejnë. Gjysmat e materialeve filmike nuk i nxjerr dot prej mllefit, dufit dhe sharjeve që njerëzit kanë për Erjon Velinë. Se i ka vjedh, i ka varfëru dhe i ka poshtëru. Dhe atë që i ka bërë është dëmi më i madh për brezin e ri”, u shpreh Këlliçi.

Gjatë bashkëbisedimit, banorët e Zallherrit nga ana e tyre ngritën shqetësimin për mungesën e ujit të pijshëm dhe të rrugëve.

“Ujë të pijshëm, normalisht aty e kemi problemin, ujin për vaditje ne as nuk e diskutojmë fare” tha një nga banorët e zonës në takim. “Këto kanë shtruar rrugët deri te shtëpiat e tërmetit” rrëfeu një tjetër.

“Ne kemi ndejt 1 muaj e gjysëm pa ujë të pijshëm dhe paguajmë lekë, pa ujë të pijshëm e dinë të gjithë”, u ankua një tjetër i pranishëm në takim.