Këshilli i Europës miraton rezolutën kundër Shqipërisë: Distancohuni nga ”Deklarata e Kajros”

Asambleja Parlamentare e Këshillit të Europës ka miratuar ditën e djeshme, në mënyrë unanime, një rezolutë kundër Shqipërisë ku bëhet thirrje për distancim të qartë nga Deklarata e Kajros. Në rezolutë përfshihen gjithashtu Turqia me Azerbajxhanin, si dhe Greqia me Mbretërinë e Bashkuar.

“Asambleja shprehu shqetësim për faktin se “ligji i Sheriatit, duke përfshirë dispozita të cilat janë në kundërshtim të qartë me Konventën Evropiane për të Drejtat e Njeriut, janë aplikuar qoftë zyrtarisht ose jozyrtarisht në disa shtete anëtare”. Shqetësimet lidhen me ekzistencën e gjykatave joformale islame, duke përmendur në veçanti ‘këshillat e Sheriatit’ në Mbretërinë e Bashkuar, ose Myftitë në Greqinë lindore që veprojnë në një kapacitet gjyqësor pa mbrojtje të duhur procedurale. Është shqetësim i madh, thanë deputetët, se “tre shtete anëtare, përkatësisht Shqipëria, Azerbajxhani dhe Turqia, kanë miratuar, në mënyrë të qartë apo të nënkuptuar, Deklaratën e Kajros”, thuhet në reagimin e Këshillit të Europës.

Në deklaratë thuhet se: Shqipëria, Azerbajxhani dhe Turqia duhet të konsiderojnë distancimin nga Deklarata e Kajros dhe të përdorin të gjitha mjetet e mundshme për të siguruar që kjo e fundit nuk ka efekt në urdhrat e tyre të brendshëm ligjor.

Çfarë është ‘Deklarata e Kajros’?

Deklarata e Kajros për të drejtat e njeriut në islam është ratifikuar në vitin 1990 nga shtetet anëtare të Organizatës së Konferencës Islamike, ku edhe Shqipëria bën pjesë, e cila e përcakton shari’an si bazë të vetme për “të drejtat e njeriut“. Kjo deklaratë shihet si e kundërta e Deklaratës së Përgjithshme të të Drejtave të Njeriut, nga e cila ajo devijon në mënyrë të konsiderueshme.

Deklarata e Kajros u miratua më 5 gusht 1990 nga 45 ministrat e jashtëm të Organizatës së Konferencës Islamike të përbërë nga 57 shtete anëtare. Ajo pretendohet se duhet të shërbejë si parim në lidhje me të drejtat e njeriut, megjithatë, pa pasur karakter të detyrueshëm për të drejtën ndërkombëtare dhe në të drejtën e shteteve nacionale anëtare të OKI-së, është pa shumë peshë.

Shqipëria dhe Këshilli i Europës

Pas rënies së komunizimit, Shqipëria nisi një proces të gjerë për anëtarësimin në organizatat ndërkombëtare. Anëtarësimi i Shqipërisë në Organizatën Islamike ka ndodhur në vitin 1992, tre vite përpara anëtarësimit në Këshillin e Europës. Këshilli i Evropës është një organizatë e shteteve evropiane, e themeluar më 5 maj 1949 për të arritur një bashkim më të madh midis vendeve anëtare mbi bazën e traditave të tyre të përbashkta të lirisë politike. Qëllimi i Këshillit të Evropës është të arrijë një unitet më të madh midis anëtarëve të tij. Ideologet më të mëdhenj të Këshillit të Evropës ishin Winston Churchill, Robert Shuman, Konrad Adenauer. /Politiko.al/