Këshilli i Legjislacionit e ”pason” te Nikolla mandatin parlamenar të Olta Xhaçkës

Çështja e mandatit parlamentar të ministres së Europës dhe Punëve të Jashtme, Olta Xhaçkës vijon të mbetet pezull. Këtë të premte, Këshilli i Legjislacionit vijoi taktikat procedurale që zvarrisin në kohë kalimin e çështjes në Gjykatën Kushtetuese.

Socialistja Ermonela Felaj që drejtoi mbledhjen, pranoi se çështja është kthyer në pikën zero. Sipas raportit të mazhorancës, çështja duhet të kalojë në Këshillin e Mandateve, që më pas duhet t’ia kalojë kryeparlamentares Lindita Nikolla për ta dërguar në finale pranë Gjykatës Kushtetuese.

Opozita mendon se hallka e parë është e panevojshme, duke kërkuar që çështja të kalojë direkt në tryezën e Nikollës. Në vend që të ndiqte një nga dy procedurat, Felaj njoftoi se të dyja raportet do t’i kalojnë kryeparlamentares, që do të vendosë më pas cilën rrugë do të ndjekë.