Këshilltari i Bashës: Do të anulojmë PPP-të që rëndojnë xhepat e shqiptarëve

Partia Demokratike në programin ekonomik të prezantuar sot kishte si premtime kryesore vendosjen e një takse të sheshtë 9% dhe hapjen e 110 mijë vendeve të punës. Krahas dyfishimit të ndihmës ekonomike për familjet në nevojë, Basha premton edhe rritje të pensioneve dhe të pagës minimale se dhe lehtësimin e barrës fiskale të biznesit.

Këshilltari i kreut të PD-së për ekonominë, Dorian Teliti thotë se programi u jep përgjigje problemeve ekonomike në vend dhe të gjitha premtimet shoqërohen me kosto për realizimin e tyre. ”Sa më keq ta gjesh ekonominë aq më shumë punë do të duhet për ta rimëkëmbur. Sot ekonomia është në momentin më të vështirë në 30 vite, njerëzit po humbin punë dhe bizneset po mbyllen”.

Për më tepër, ai ka thënë se PD mbështet një sistem taksimi të thjeshtë dhe me norma të ulëta në mënyrë që të thithen investime të huaja. ”Taksa e sheshtë do t’u vijë në ndihmë bizneseve që të kenë më shumë para të xhepin e tyre dhe jo t’i hedhin në arkën e shtetit dhe që më pas të përfundojnë në duart e oligarkëve”. Teliti shton se në programin e PD parashikohet dhe anulimi i PPP-ve që rëndojnë xhepat e shqiptarëve dhe kjo pritet të bëhet duke aktivizuar mekanizmin e antimafias.