Kim Mehmeti: Rama u shqetësua më shumë për vizitën e Kurtit se sa të Vuçiçit

Nga Kim Mehmeti –

E çuditshme por, Tiranën zyrtare më shumë e shqetësuan deklaratat dhe vizita e fundit e kryetarit të VV-së, se sa ajo e dikurshmja e Vuçiçit në Shqipëri, kur Kryeministri i mëmëdheut e trajtoi atë si të ishte bamirës më i madh i shqiptarisë e jo një nga hartuesit e projekteve vrastare ndaj popullit tonë.

A në të vërtet kryetari i VV – së në Tiranë tha atë që i ka hije ta thotë politikani i vetëm shqiptarë që ka mbështetës në të gjitha trojet shqiptare dhe që e drejton patinë që ka mundësi të bëhet strehë e shpresës rinore mbarëshqiptare.

Dhe zhurma që u ngrit lidhur me atë që tha kryetari i VV në Tiranë ka të bëjë me atë se idetë e tij janë të ‘rrezikshme’ për nëntokën politike, që vepron e ndërlidhur sa u përket trojeve shqiptare.

Nuk duhet harruar se të gjitha partitë shqiptare të trekëndëshit Tiranë-Prishtinë- Shkup janë të lidhura mes veti, por jo nëpërmjet ndonjë ideali apo qëllimi mbarëkombëtarë, por nëpërmjet bizneseve të drejtuesve të tyre.

Dhe kuptohet që idetë e kryetarit të VV janë të rrezikshme për këto parti dhe për nëntokën politike e cila bashkëpunon ngushtë me kryeqendrën e bizneseve të dyshimta në Ballkanit – me Beogradin.

Zhurmën lidhur me deklaratat e kryetarit të VV-së e mbuloi ajo lidhur me debatin se pse Kryeministri i Shqipërisë ka vendosur që ‘Rilindjen’ e tij ta bëjë shoqatë të gjysheve shqiptare!?

Pa dyshim se me ‘gjyshet’ e famshme deputete të partisë së vet, ai e vazhdon cirkun dhe talljen me shqiptarët, duke i çuar ata të merren me pleqtë e plakat që do i bëjë deputetë e deputete, e jo me gërmadhat që la pas vetes, si ato të Teatrit Kombëtarë.

Dhe duke u marrë me gjyshet që Piktori do i bëjë deputete, populli duhet të harrojë se Shqipëria është bërë vend që shpopullohet, vend i pabanueshëm për të rinjtë, vend ku ka kush të vdes, por nuk ka kush të martohet e kush do lindë fëmijë.

Pra duke u marrë me nopranllëqet e Kryeministrit të tanishëm, populli duhet të harrojë se ne pakësohemi, jo pse nënat shqiptare nuk lindin dhe pse nuk shumohemi, por pse shpërndahemi nëpër botë, pra pse ekzistojmë por nuk i popullojmë tokat tona, por vendet e huaja si dhe, pse deshqiptarizohemi.

Pastaj, me gjyshet që do i bëjë deputete, ai e shpërfaqë fytyrën e vërtet të Shqipërisë që plaket, e cila bëhet vend ku shtohen azilet e pleqve, e ku pakohen dhe mbyllen foshnjoret e shkollat.

Më në fund duhet pranuar se Piktori më mirë se kushdo tjetër e ka kuptuar se shqiptarët e duan zbavitje, se ata shkrihen nga kënaqësia kur Prijësi ua prek dorën, prekje e cila nga askushi të bënë të jesh dikushi. Andaj edhe shoqëritë shqiptare janë tregua si toka pjellore për diktatura e diktatorë.

Pastaj Piktori i dinë se ne shqiptarët jemi të ndjeshëm ndaj gjysheve dhe atyre nuk ua prishim as atëherë kur nuk dëgjojnë e nuk shohin mirë, dhe nëpërmjet tyre ai donë t’i amortizojë kritikat ndaj tij.

Ndërkohë nuk duhet harruar se më të nënshtruarit në politik janë të plakurit në rini dhe të fëmjëruarit në pleqësi, e të cilët joshen nga përkëdheljet e prijësit.