KLSH “shuplakë” Ramës për buxhetin: Janë rritur detyrimet e prapambetura, PPP-të me problem
Kontrolli i Lartë i Shtetit ka “shkundur” Ministrinë e Financave sa i takon performancës së financave publike gjatë vitit 2018. Sipas KLSH, shqetësim kryesor është rritja e detyrimeve të prapambetura me 12 miliardë lekë, çka bën që niveli i deficitit buxhetor të jetë më i lartë se 1.6 për qind.
KLSH evidenton gjithashtu se nuk është zbatuar ligji sa i takon prokurimeve publike dhe janë miratuar kontrata me vlera më të larta se fondet e vëna në dispozicion.
Edhe këtë vit, kontratat koncesionare nënvizohen si shqetësim për Kontrollin e Lartë të Shtetit.
Në raportin mbi buxhetin e vitit 2018, ndër të tjera KLSH evidenton se 32 për qind e shpenzimeve janë bërë në muajin Dhjetor, duke rritur riskun e efiçencës së punëve publike, duke mos lënë pas gjetjet sa i takon problemeve me rimbursimin e TVSH-së dhe rritjen e faturës së gjyqeve për largimet nga puna.
