Komisioneri Oliver Varhelyi: Të mos ndalohen koalicionet para dhe pas zgjedhjeve

Komisioneri i Zgjerimit, Oliver Varhelyi deklaroi sot në konferencë me kryeministrin Edi Rama se çështja e koalicioneve nuk mund të pengohet me ligj.

Për herë të parë, zyrtari i lartë i Bashkimit Europian pranoi publikisht se qytetarëve nuk mund t’u imponohen ndalimet e aleancave parazgjedhore dhe paszgjedhore. “Sa i përket reformën zgjedhore, ne po analizojmë votën e Kuvendit. Duke u bazuar te debati politik përpara dhe gjatë procesit të votimit, duket se ka të bëjë me një çështje që e thashë edhe dje. Për sa kohë që koalicionet paszgjedhore nuk parandalohen, atëherë ne mund ta shikojmë atë ligj me një mendje të hapur, por nuk mund të kufizojmë të drejtat e të zgjedhurve për të formuar koalicione para dhe pas zgjedhjeve. Shpresojmë shumë që pas marrëveshjes së 5 qershorit, shpresoj që të gjitha partitë politike të marrin pjesë në zgjedhje”-, theksoi ai.

Qëndrimi i Oliver Varhelyi tregon distancim të qartë nga mënyra sesi qeveria “Rama” votoi ligjin në parlament.  Oliver Varhelyi  tha se është vendimtare sundimi i ligjit dhe klima e investimeve në vend, duke apeluar për një gjyqësor të pavarur. “Na duhet të shikojmë që gjyqtarët e Gjykatës Kushtetuese të jenë në punë”, nënvizoi ai.