Kontrolle në plazhe, gjobitet drejtuesi i mjetit lundrues për shkelje sigurie

Një rast i shkeljes së rregullave të lundrimit është regjistruar në jug të vendit, duke ngritur shqetësime për sigurinë e pushuesve në nisje të sezonit veror, kur fluksi i turistëve në zonat bregdetare është në rritje.

Sipas denoncimeve  të qytetarëve, një mjet lundrues tip Jet Ski është afruar në mënyrë të rrezikshme pranë zonës së bregut, duke kaluar perimetrin e sigurisë të përcaktuar dhe duke krijuar rrezik për personat që ndodheshin duke u larë në det. Pushuesit kanë reaguar menjëherë duke njoftuar Policinë e Shtetit dhe duke dërguar edhe pamje filmike që dokumentonin situatën.

Pas marrjes së sinjalizimeve, Policia Kufitare e Stacionit të Triportit, në bashkëpunim me Njësinë Policore Detare, ka ndërmarrë veprimet e nevojshme për identifikimin dhe ndalimin e mjetit lundrues. Jet Ski është konstatuar teksa lëvizte pranë zonës së Karaburunit dhe më pas është ndaluar ndërsa po i afrohej molit të peshkimit në territorin e SPK Triport.

Autoritetet kanë bërë të mundur bllokimin e mjetit lundrues në pikën e përcaktuar për sekuestrimin e mjeteve detare, pranë zonës së SMIL-it. Drejtuesi i tij, shtetasi E. U., është ndëshkuar me masë administrative në vlerën 500.000 lekë të rinj, për shkelje të perimetrit të sigurisë dhe rrezikim të jetës së pushuesve.

Policia e Shtetit ka bërë të ditur se kontrollet në zonat bregdetare do të vijojnë gjatë gjithë sezonit veror, me qëllim garantimin e sigurisë në plazhe dhe parandalimin e rasteve të ngjashme që mund të rrezikojnë qytetarët dhe turistët.