Krasniqi në Bukuresht: Fokus te mbrojtja e të miturve dhe siguria online në epokën digjitale

Në Parlamentin e Rumanisë në Bukuresht po zhvillohet dita e dytë e Forumit të Komunikimeve Digjitale dhe Medias, organizuar nga Instituti Ndërkombëtar i Komunikimeve (IIC), ku janë diskutuar sfidat kryesore të rregullimit të hapësirës digjitale dhe mbrojtjes së përdoruesve online.

Në këtë aktivitet mori pjesë edhe kryetarja e Autoritetit të Mediave Audiovizive, (AMA) Armela Krasniqi, e cila ishte pjesë e panelit të dedikuar balancimit mes inovacionit teknologjik, të drejtave të konsumatorit dhe sigurisë në internet.

Në fjalën e saj, Krasniqi theksoi rëndësinë e bashkëpunimit ndërkombëtar për përballimin e sfidave që sjell zhvillimi i platformave digjitale.

“Bashkë me kolegen Mari Velsand nga rregullatori i Norvegjisë, përfaqësuesin e Netflix, Peter Matzneller, drejtorin e Shërbimeve Digjitale të Autoritetit rumun për Menaxhimin dhe Rregullimin në Komunikime, Călin Cozan, dhe nën moderimin e kryetares së rregullatorit të Barbados, Allyson Leacock, diskutuam mbi mbrojtjen e të miturve online, përgjegjësinë e platformave digjitale, trajtimin e përmbajtjeve të paligjshme, si edhe sfidat që sjell zbatimi i rregulloreve të reja”, u shpreh ajo.

Krasniqi nënvizoi gjithashtu se tregu digjital po ndryshon me shpejtësi dhe kërkon qasje të koordinuar mes rregullatorëve dhe platformave globale.

Në kuadër të forumit, ajo prezantoi edhe rezultatet e bashkëpunimit AMA–TikTok dhe AMA–X, duke evidentuar llojet e shkeljeve të përmbajtjeve të paligjshme të raportuara nga publiku shqiptar në këto platforma.

“Prezantova rezultatet e bashkëpunimit AMA–TikTok dhe AMA–X, si dhe llojet e shkeljeve që kemi hasur në përmbajtjet e paligjshme të raportuara nga publiku shqiptar”, theksoi Krasniqi gjatë diskutimit.

Ky aktivitet i rëndësishëm shënoi një hap domethënës në forcimin e bashkëpunimit ndërkombëtar mes rregullatorëve të medias dhe platformave digjitale, duke vënë në qendër sfidat e sigurisë online, mbrojtjen e të miturve dhe përgjegjësinë e aktorëve globalë në një mjedis teknologjik që ndryshon me ritme të shpejta. Gjatë diskutimeve u theksua nevoja për standarde të përbashkëta dhe koordinim më të ngushtë, në mënyrë që të garantohet një hapësirë digjitale më e sigurt dhe më e përgjegjshme për përdoruesit.

ATSH