Kreu i ISHP: Shqipëria ka njohur kurbë të butë, masat do ulen në javën…

Covid-19 ka prekur 409 persona dhe i ka marrë jetën 23 të tjerëve në vendin tonë, kurse të shëruar janë 154. A erdhi agresiv ky virus në vendin tonë? Drejtorja e Institutit të Shëndetit Publike, Albana Fico gjatë një interviste për “Ilva Now”, ka deklaruar se kurba e indeksit të zhvillimit të epidemisë në Shqipëri është një kurbë e butë.

“Numri i të shtruarve në spital dhe numri i rasteve pozitive, ka një burim ushqimi dhe ky është infeksioni. Ajo që kemi kuptuar deri tani është se kurba e infeksionit, zhvillimi i epidemisë është një kurbë e butë dhe kjo logjikisht të çon se dhe burimi i infeksionit të jetë i kësaj përmase”. Sipas saj po punohet për kryerjen e testimeve të shpejta për të kuptuar se sa është shkalla e infektimit në popullatë. Këtu kreu i ISHP-së iu referua shembujve të Italisë dhe SHBA-së që kanë nisur kryerjen e rapid test, e cila nxjerr rezultatin brenda 5-6 minutash.

“SHBA dhe Italia po testojnë aktualisht ata që janë hite në mënyrë që të validojnë dhe të shkojnë më gjerë për të kuptuar infeksionin e popullit. Ka një seri kitesh, janë rapid test, ngjajnë ato testet e shtatzënisë dhe për 5-6 minuta merret përgjigje. Ky test po shikohet me kujdes”. Për sa i përket masave lehtësuese që qeveria ka paralajmëruar javën e ardhshme, Fico deklaroi se “një gjë shumë e rëndësishme është se duhet të vlerësohet risku i grupit që do të përfitojnë nga ky lehtësim”.