Kreu i KQZ-së për pjesëmarrjen në zgjedhje, Celibashi: Presim mbi 1.6 milionë qytetarë!
Komisioneri shtetëror për Zgjedhjet , Ilirjan Celibashi tregon se nuk i ka ardhur njoftimi në shtëpi nga bashkia për vendin e votimit dhe numrin e votuesit, por ai beson se fushata e kryer nga KQZ-ja është ndër më të mirat për informimin e zgjedhësve dhe pjesëmarrja do të jetë e lartë.
Në zgjedhjet e fundit parlamentare të 2021 morën pjesë 1.66 milionë votues. “Slogani ynë është Voto që të dëgjohesh. Nëse nuk voton, nuk të dëgjon njeri”,-tha Celibashi, i cili iu përgjigj edhe shqetësimit të opozitës për ndryshimin e qendrës së votimit për mbi 1 milionë votues.
Komisioneri shtetëror për Zgjedhjet e konfirmoi këtë numër, por ai tha se nuk ka vend për shqetësim. “Nuk ka ndryshime të adresës së vendndodhjes së QV. Ka lëvizje brenda për brenda fraksioneve. Pra, mbetet e njëjta shkollë për shembull, por mund të ndryshojë kati ku ndodhet QV brenda të njëjtës shkollë”.
Po ashtu Celibashi tha se ky ndryshim ka ndodhur, pasi listat e votuesve tani hartohen sipas kodit të vendbanimit të votuesit dhe më pas renditen sipas mbiemrit. Në lidhje me detyrimin e Kodit Zgjedhor për njoftimin e qytetarëve për QV dhe numrin e votuesit nga njësia bashkiake, Celibashi pranoi se ka anomali.
