Kreu i Shtetit: Pushteti vendor në shërbim të kapjes së votave. Po keqpërdoren taksat e qytetarëve

​Presidenti i vendit, Ilir Meta, shprehet se puna e 61 bashkive në vend duhet të përqendrohet në përmirësimin e shërbimeve ndaj qytetarëve dhe jo për të kapur vota me pahir e presione.

Përmes një postimi në Facebook, kreu i shtetit thotë të mos keqpërdoren taksat e qytetarëve për të shtuar fondin e pagave për fushatë partie.

Mesazhi i plotë i Presidentit Meta në Facebook:

Është shumë e rëndësishme që 61 bashkitë të përqëndrohen në përmirësimin e shërbimeve ndaj qytetarëve dhe jo në “kapjen” e votave me pahir dhe presione ordinere me bukën e gojës.

Rritja e taksave që paguajnë qytetarët nuk u është kthyer në shërbime më të mira, përkundrazi në degradim të tyre.

Kur kjo ndodh në Elbasan, mendoni në bashkitë e tjera.

Çdo zyrtar të bëjë detyrën me përgjegjësi të lartë ndaj qytetarëve dhe komunitetit.

Fatkeqësisht reforma administrative u keqpërdor për të përqëndruar pushtetin vendor në pak duar e jo për të përmirësuar shërbimet ndaj qytetarëve.

Taksat e qytetarëve të mos keqperdoren për të shtuar fondin e pagave për fushatë partie, por për të përmirësuar shërbimet ndaj qytetarëve.

NDAL abuzimit me pushtetin vendor nga cilido!