Kryebashkiak për shqiptarët, eurodeputet për grekët

I burgosuri Fredi Beleri, të cilin mbi 237 mijë grekë e votuan të dielën për të qenë anëtar i Parlamentit Evropian, është një ngjarje dhe një rast shumë i rrallë në histori. I dënuar për blerje votash në Shqipëri bëhet anëtar i ligjvënësve të Bashkimit Evropian. Beleri u rend i katërti mes të votuarve si kandidat në zgjedhjet helene dhe bëhet një prej 21 eurodeputetëve grekë në PE dhe një prej 7 të zgjedhurve nga sigla e Nea Demokracia te Mitsotakis. Beleri nga burgu i Fierit ku ndodhet që prej 12 majit 2023 për blerje votash, e quajti fitoren e tij një triumf të dritës ndaj errësirës.

Zgjedhja e Belerit eurodeputet është një çështje që pritet të shkaktojë edhe më shumë debate në vend. Juridikisht zgjedhja e tij nuk ndikon në procesin penal që i bëhet në Shqipëri. Imunitetin eurodeputetët e kanë vetëm në shtetet anëtarë të Bashkimit Evropian dhe jo në Shqipëri.

Një vendim pafajësie, edhe pse duket e vështirë, nga Apeli do ta vinte Belerin para zgjedhjes, mes Himarës apo postit si eurodeputet. Por një vendim i shpejtë i Gjykatës së Apelit duket se nuk po i interesin Fredi Belerit, Seancat e fundit kanë dështuar pasi avokatët e tij nuk janë paraqitur. Eurodeputetit të ri mbase do t’i interesonte të bëhet një çështje debati në parlamentin e ri evropian.

Besnik Muçi, ish-anëtar i Gjykatës Kushtetuese, thotë se Beleri nuk është përballë një zgjedhjeje të detyruar, pasi për të legjislacioni shqiptar nuk e kufizon Belerin të ushtrojë mandat të dyfishtë. “Ligji për qeverisjen vendore e ndalon një drejtuesi që të jetë deputet i Shqipërisë, nuk e di a mund të përdorim këtë analogji për Parlamentin Europian, unë gjykoj që jo”, tha ai.

Pavarësisht këtyre parashikimeve, Muçi është i idesë se kjo çështje do të shkojë për interpretim në Gjykatën Kushtetuese, lidhur me dy betimet e Belerit, një për të mbrojtur e shtetin shqiptar dhe qytetarët e Himarës, ndërsa tjetri për interesat e grekëve në Europë.

Por Beleri është në masën e arrestit me burg, i dënuar me dy vite, ndërkohë procesi për një vendim të formës së prerë vijon në apel. Kjo masë dënimi për të plotësohet në muajin shtator, por a lejohet që ai të lërë qelinë ndërkohë që gjyqi mund të vijojë? m“Lirohet kur plotësohet afati”, tha Muçi.