Kryebashkiaku më jetëgjatë, kush është “beu” i PS me 5 mandate

Vijon numërimi i votave të votimeve të djeshme, edhe pse fituesit ishin të përcaktuar paraprakisht. Numërimi i votave në këto votime, se zgjedhje s’mund të quhen, nuk ka sjellë asnjë surprizë, ku ashtu siç pritej, PS do të marrë të gjitha bashkitë.

Por, më i çuditshëm është fakti se disa bashki do të vijojnë të drejtohen nga i njëjti emër, prej shumë vitesh. Rekordin e thyen Bashkia e Poliçanit, në të cilën Adriatik Zotkaj ka marrë sot mandatin e pestë. Zotkaj do të drejtojë edhe për katër vite të tjera Poliçanin, pasi në këto zgjedhje ka arritur të fitojë me 4681vota.

Ai drejton bashkinë e Poliçanit prej vitit 2004 dhe mban titullin “Qytetar Nderi” i qytetit, që drejton prej 15 vjetësh. Zotkaj është një ndër kryebashkiakët më jetëgjatë. Në zgjedhjet e fundit lokale të vitit 2015, ai fitoi me 72.46% të votave.

Gjithashtu, disa kandidatë të tjerë të PS kanë arritur të marrinë mandatin e tretë. Të tillë janë kryebashkiaku i Lushnjes, Fatos Tushe, dhe ai i Himarës, Jorgo Goro. Të dy këta kryebashkiakë do të drejtojnë edhe për katër vite të tjera nën siglën e PS, duke u bërë kështu drejtues të këtyre bashkive për 12 vite me radhë.