Kryeprokurori Çela flet pa dorashka: Krimi po kontrollon Elbasanin

Elbasani është kthyer në vendin më të inkriminuar. Kryeprokurori Olsian Çela, foli pikërisht për këtë situatë të paprecedentë të krijuar në këtë qytet. Zyrtari i lartë i Prokurorisë pranoi se qyteti po kontrollohet nga krimi dhe se prokuroria dhe policia nuk mund ta tolerojnë më që ky qytet të përdoret për të larë hesapet mes bandave, prandaj shtoi se ndaj tyre duhet një përgjigje ekzemplare. ”Niveli i krimit të rëndë dhe organizuar në Elbasan po rritet. Po vihet se re krimi po kontrollon qytetin dhe jetën ekonomike. Kërkojnë vëmendje të veçantë dhe përgjigje ekzemplere nga shteti. Një qytet s’mund të kthehet në vend për luftë mes bandash për kontroll territoresh apo për hesapet mes tyre. Kjo që ndodh është maja e ajsbergut. As Elbasani dhe as qytete të tjera nuk mund të merren peng nga këto grupe”,-tha Çela.

Nga ana tjetër, ai kërkoi që të ndërhyjnë edhe forca më të specializuara që në qytet të kthehet normaliteti. ”Neve nuk do të shpikim rrotën, kemi eksperienca shumë pozitive se si është përballur shteti me këto grupe, s’na mungojnë njerëzit e aftë, as mjetet për ta luftuar krimin. Nga ana e prokurorisë dhe policisë së shtetit janë të gjithë të angazhuar t’ju mbështesim për të përballuar situatat kriminale. Ka nevojë për një qaseje tjetër, përgjigjja s’mund të jetë vetëm e prokurorisë dhe policisë. Ka struktura të tjera të specializuara që duhet të përfshihen. Duhet t’i japim përgjigje sa më të shpejtë pasi situata është e jashtëzakonshme”,-theksoi Zyrtari i lartë i Prokurorisë.

Prej disa javësh vendi po përjeton krime të frikshme, çdo ditë vërshojnë plumbat edhe nën sytë e forcave speciale të Policisë së Shtetit. Atentate me eksploziv në limitet e një akti terrorist, ekzekutime mafioze e deri tek vrasje me thikë apo dhe ato për motive banale, kanë bërë që policia ti përgjigjet situatës me postblloqe. Kudo polici, forca speciale, të armatosur deri në dhëmbë që po terrorizojnë qytetarët. Por a tregon ky reagim se kemi një polici të dobët? Pra një polici që ngrihet në këmbë kur situata i del nga kontrolli dhe bën propogandë? Policia ka qenë në dijeni se 71-vjeçari Lutfi Zhudri ishte tip problematik dhe një rrezik për banorët që jetojnë në pallatin tek lagjja “11 Nëntori” në Elbasan. Letrat drejtuar autoriteve vendore por dhe policisë, si dhe dëshmitë e banorëve tregojnë se shqetësimet e tyre nuk ishin marrë parasysh. Nëse policia nuk shfaqur interes për këtë rast, si do të mundet ajo të luftojë me bandat?

Në 6 vitet e fundit janë shënuar mbi 386 vrasje. Ekzekutime mafioze, krime në familje dhe shpërthime me tritol, janë ngjarjet që kanë vënë në pikëpyetje sigurinë e jetës. Shumica e vrasjeve janë ende pa autorë. Ministri i Brendshëm, Sandër Lleshaj përpiqet që të minimizojë ngjarjet e fundit kriminale teksa promovon skuadrat “Shqiponja” nëpër Shqipëri, duke thënë se këtë vit kemi numrin më të ulët të vrasjeve. Shifrat flasin ndryshe. Në 6 mujorin e parë të vitit 2020, kur Shqipëria dhe bota u izoluara për disa muaj për shkak të pandemisë së Covid-19, u regjistruan 24 vrasje. Grupet kriminale kishin kohën në favor të tyre, që të mendonin për metodat të cilat kanë rezultuar më të sofistikuara. Mbi të gjitha autoritetet janë larg zbardhjes të së vërtetës.