Kryetari i Bashkisë Elbasan, Gledian Llatja, në Stokholm: Përvetësim i praktikave më të mira për qytete të qëndrueshme

Kryetari i Bashkisë Elbasan, Gledian Llatja, zhvilloi një vizitë në Stokholm, ku mori pjesë në sesione të ndryshme të organizuara në kuadër të programit TAIEX, për të përvetësuar praktikat më të mira drejt qyteteve neutrale ndaj klimës. Gjatë kësaj vizite, ai u shoqërua nga ekipi i Bashkisë Elbasan.

Në një takim me nënkryetaren e bashkisë së Stokholmit, Asa Lindhagen, u diskutuan plane investimesh të përbashkëta, zgjidhje për një mobilitet të qëndrueshëm dhe mundësitë e financimit për projekte klimatike. Fokus i diskutimeve ishte krijimi i një qyteti më të gjelbër dhe më të qëndrueshëm, ku investimet në mobilitet të qëndrueshëm dhe veprime klimatike të bëhen prioritete.

Ky bashkëpunim përforcon angazhimin e Bashkisë Elbasan për të ndjekur modele evropiane të qëndrueshmërisë dhe për ta bërë qytetin një shembull për zhvillimin miqësor ndaj mjedisit dhe për një jetë cilësore për qytetarët.