Kumanova, 2 video të grupit të UÇK, dyshime për montazh

Policia maqedonase ka publikuar mbrëmjen e së dielës një video të dytë të personave të arrestuar nga grupi i të armatosurve. Ata ndodhen brenda komisariatit të policisë ndërsa sipas procedurave fotografohen nga efektivët. Pjesëtarët e Ushtrisë Çlirimtare Kombëtare, që kanë marrë përgjegjësinë për konfliktin e armatosur që shpërtheu të shtunën në Kumanovë, shfaqen në këtë video me uniforma ushtarake që mbajnë stemën e UÇK-së.  Në fytyrat e disa prej tyre duken edhe dëmtime të marra gjatë përleshjes së dhunshme me policinë.

Ndërkohë, në konferencën për mediat ku bëri bilancin e operacionit policor, zëdhënësi i policisë tha se mes të arrestuarve nga Kosova dhe Maqedonia, ishte edhe një shqiptar nga Shqipëria, por nuk bëri të ditur emrin e tij.

Mediat maqedonase folën për një gafë të policisë në videon e parë të postuar me  të dorëzuarit nga grupi i të armatosurve, ku shfaqet diçka e dyshimtë sipas tyre. Në sekondën e tetë të videos polici që urdhëron të arrestuarin të rrotullohet për tu fotografuar, duket se ka të veshur një rrobë të bardhë, e njëjtë me atë që një prej të armatosurve shfaqet teksa është arrestuar nga policia maqedonase. Këto pamje sipas mediave, shtojnë dyshimet se video është një montazh.