Kur Artat, bëhen ”kamikaze” me mision

Sot opinioni publik u shokua kur mësoi lajmin se Arta Vorpsi, u ”betua” tek noteri dhe shkoi më pas tek Gjykata Kushtetuese për të qenë anëtare. Nuk ka ndodhur kurrë më parë që noteri të marrë rolin e Presidentit të Shqipërisë. Kopjen e betimit, Vorpsi ia ka dërguar Presidentit Meta, KED dhe Gjykatës Kushtetuese me Postë, ndërkohë që akti bie ndesh me nenin 8 të Kushtetutës ku parashtrohet qartë se anëtari i Gjykatës fillon detyrën pasi betohet tek presidenti.

Nga: Lapsi.al

Kur Arta Marku u emërua në mënyrë të paligjshme, kryeprokuore e përkohshme, pothuajse dy vite më parë, Lapsi.al mbajti një qëndrim të thjeshtë: se si do të ishte drejtimi i institucionit pej saj, kuptohej që nga mënyra sesi ajo u betua. Një juriste me integritet, profesionale dhe që ka sadopak respekt për veten, nuk do të mund të pranonte kurrë të betohej mes një parlamenti me tym dhe flakë, vetëm për t’u përdorur si kamikaze kundër opozitës.

“Profecia” jonë rezultoi e vërtetë. Edhe të mërkurën gjatë prezantimit që bëri para KLP, Arta Marku pohoi me gojën e saj se dështoi të realizonte pritshmëritë e publikut. Ajo u soll si kamikaze për t’i shërbyer partisë që e vuri në detyrë, duke mos hetuar as dosjen e vjedhjes së votave, as dosjen e Unazës së re dhe as dosjen e Saimir Tahirit e Agron Xhafës. Ajo e ushtroi detyrën njësoj ashtu siç u betua.

Basti i Lapsi.al para dy vitesh vlen sot edhe për një Artë tjetër, këtë herë me mbiemrin Vorpsi. Ajo u caktua në mënyrë antiligjore anëtare e Gjykatës Kushtetuese nga Ardian Dvorani dhe Gramoz Ruçi. E deri këtu çështja mund të hante interpretim. Ajo që kjo grua ka bërë sot, e kalon jo cakun e logjikës së një juristi, por edhe atë të një punonjëse pastrimi të bashkisë Tiranë. Ajo ka pranuar me urdhër partie të bëjë betimin e saj tek noteri (poshte), ndërkohë që kushtetuta e ka të caktuar qartë se ajo fillon detyrë vetëm pasi betohet tek presidenti.

Ndonëse shumë nga kolegët e saj, e përshkruajnë si më të zonjën dhe më profesionisten nga të gjitha kandidaturat e paraqitura nga KED, Arta Vorpsi sot ka hedhur një grusht baltë mbi gjithë të shkuarën e saj. Ajo është sjellë thjeshtë si një kamikaze partiake. Pas këtij akti, pak rëndësi ka nëse rilindja e fut përdhunshëm në zyrën e Kushtetueses ashtu sikurse mund të fusin në dhomat me xhama të Amsterdamit një grua të dhunuar shqiptare, pas kësaj ajo e tregoi se cili është profili dhe personaliteti i një njeriu që regjimi zgjedh për drejtësinë e re.

Ne e pamë Artën e parë, ndaj e dimë se nuk do të ketë asnjë gjë të artë as tek e dyta.