Kurti nga Durrësi: Ndihma është obligim, takim qeverish për gjendjen

Kryeministri i ardhshëm i Kosovës, Albin Kurti ka vizituar sot banorët e prekur nga tërmeti në qytetin e Durrësit.

Pasi mori pjesë në varrimin e dy vëllezërve Abazi në Gjilan, Kurti vizitoi personat e strehuar në stadiumin Niko Dovana të Durrësit.

“Erdhëm që të shohim konkretisht gjendjen. Besoj që në një krizë të tillë, ushtria është edhe mjeti edhe mënyra më e mirë për organizim të duhur. FSK dhe Ushtria e Shqipërisë po bashkëpunojnë në mënyrë të shkëlqyeshme. Me profesionalizmin e tyre, ata po na i ngrohin zemrat se do të dalim nga kjo gjendje e rëndë që na ka goditur. Besoj që dy Qeveritë tona duhet të takohen dhe tema të jetë gjendja pas tërmetit”, u shpreh kreu i Vetëvendosjes.

Mes 49 viktimave që shkaktoi tërmeti tragjik i 26 nëntorit ishin edhe dy vëllezërit Abazi nga Kosova.

Gjatë fjalës së tij Kurti shtoi gjithashtu se “ndihma për njëri tjetrin nuk është dhuratë, por është obligim, por është e rëndësishme  që të jetë sa më e organizuar.”