Kush është presidenti i ri i Kroacisë, ish-këshilltari i Ramës dhe akuzat për korrupsion kur ishte në pushtet

Kroacia ka zgjedhur në raundin e dytë të zgjedhjeve Zoran Milanoviç si presidentin e ri të vendit.

Duke mposhtur presidenten e deritanishme nga partia konservatore Bashkimi Demokratik Kroat, me 52.7 për qind të votave në krahasim me Kolinda Grabar-Kitaroviç e cila mori 47.3 për qind të votave, Zoran Milanoviç kryesoi ndaj 11 kandidatëve të tjerë që në raundin e parë të zgjedhjeve.

Kush është Milanoviç?

Ka shërbyer si këshilltar në misionin kroat në Bashkimin Evropian dhe NATO në Bruksel nga 1996 në 1999.

Milanoviç ka qenë kryeministër i vendit gjatë viteve 2011-2016, kur drejtonte Partinë Socialdemokrate (SDP), një parti e qendrës së majtë.

Pasi humbi zgjedhjet u tërhoq dhe punoi si këshilltar politik. Ai ka qenë edhe këshilltar për integrimin i kryeministrit Edi Rama.

Gjatë një konference me Komisionerin për Zgjerim, Johannes Hahn, Rama e konfirmoi këtë fakt duke thënë se Milanoviç ishte një prej këshilltarëve të tij më të mirë.

“Kroacia është e jashtëzakonshme, është një shembull fantastik i mënyrës se si ta ndjekim këtë ambicie. Zoran është një mik i madh, i kam kërkuar këshillim dhe do ti kërkoj sa herë ta takoj, më duhet t’i them se ai është kaq i mirë me mua se asnjëherë nuk është i vonë kur jep këshillat e tij”, u përgjigj Rama në atë kohë.

Në fillim të 2014-ës kur ishte kryeministër, partia e tij në pushtet ka qenë e përfshirë në akuzat e korrupsionit. Në maj të këtij viti, ai shkarkoi i ministrin e financave, Slavko Linic dhe punonjës të tatimeve pas akuzave për një marrëveshje korruptive.

Milanoviç njihet edhe si përkrahës i të drejtave të komunitetit LGBT./ Politiko.al