Kuvendi vendos nesër, për arrestimin e Prengës
Të dielën pritet të mblidhet Këshilli për Rregulloren, Mandatet dhe Imunitetin për t’i dhënë autorizimin Kuvendit për arrestimin e Deputetit socialist Armand Prenga, i cili u ndalua nga policia në kushtet e flagrancës pas konfrontimit me armë në orët e para të mëngjesit të ditës së sotme, ngjarje e ndodhur në qytetin e Laçit mes familjarëve të tij dhe familjes Cali.
Prokuroria do t’i drejtohen Kuvendit për të kërkuar dhënien e autorizimit për arrestimin dhe fillimin e ndjekjes penale për deputetin e qarkut të Lezhës.
Por Prokuroria e Përgjithshme nuk e ka dërguar ende në Kuvend kërkesën për heqjen e imunitetit për të legjitimuar arrestimin e Deputetit Prenga.
Prokurorët janë në pritje të dokumentacionit për ngjarjen nga ana e policisë.
Me njoftimin e Kuvendit, duhet të mblidhet Këshilli për Imunitetin dhe Mandatet, i cili ia kalon çështjen për votim seancës plenare.
Nëse Kuvendi voton pro kërkesës së Prokurorisë, i kërkon masën e arrestit Gjykatës së Lartë.
Ligji thotë se të gjitha këto procedura duhet të kryhen brenda 72 orësh, çka do të thotë se brenda ditës së martë Gjykata e Lartë duhet të marrë një vendim për Deputetin Prenga.
Deputeti Armand Prenga eshte një nga deputet e maxhorancës për të cilët opozita pretendon se janë persona me të shkuar kriminale.
Prenga është bërë objekt i përplasjeve fizike dy herë brenda ambjenteve të Kuvendit.
Në maj të 2014 Deputeti socialist pas një debati verbal me Deputetin Gent Strazimiri e goditi atë me rripin e pantallonave në korridoret e kryesisë së Kuvendit ndërsa në shkurt të 2011 ai goditi me grusht Deputetin e maxhorancës në atë kohë demokratin, Edi Paloka.
Prenga është dënuar nga Këshilli për Rregulloren, Mandatet dhe Imunitetin për të mos marrë pjesë në seancë për një kohë të caktuar.