La Repubblica: Në autostradë paguhet, Shqipëria proteston

Shqipëria, vendi i vogël dinamik ballkanik e cila është duke u zhvilluar dhe ndodhet drejt rrugës për në Bashkimin Europian, shkruan e përditshmja italiane La Repubblica.

Taksa e parë për autostradën, që lidh kryeqytetin Tirana me Kosovën ka çuar në akte dhune. Demonstruesit kanë shkulur sportelet ku paguhet kjo taksë dhe u kanë vënë flakën atyre. Ka shumë të plagosur gjatë përleshjeve mes manifestuesve dhe policisë.

Trazirat në “Rrugën e Kombit”, “pushtuan” mediat ndërkombëtare. Prestigjiozet Reuters, Washington Post, The New York Times, raportuan dhunën që pasoi protestën e banorëve, të cilët u përplasën ashëpr me policinë.

Episodet e dhunshme kanë qenë në qendër të vëmendjes të këtyre mediave, të cilat përshkruanin çastet kur protestuesit e zemëruar goditën me gurë drejt policisë dhe i vunë flakën sporteleve në shenjë kundërshtie ndaj tarifës.

Prestigjiozet gjithashtu shkruajnë edhe për reagimin e kryeministrit Edi Rama, i cili deklaroi se dhuna ndaj pronës dhe policisë do të ndëshkohet. Nuk mbeti jashtë vëmendjes as reagimi i presidentit Ilir Meta, i cili bëri thirrje për qetësi dhe dialog, si dhe i kryetarit të opozitës Lulzim Basha, i cili i kërkoi kryeministrit Rama pezullimin e tarifës për kalimin në Rrugën e Kombit.