Putini paralajmëron NATO-n për trupat në Ukrainë: Sulm bërthamor, qytetërimi europian zhduket!

-Botuar në radion shtetërore gjermane, DW-

Presidenti rus Vladimir Putin kërcënoi me një sulm atomik po të angazhohen ushtarë të shteteve perëndimore në Ukrainë. Fjalimin drejtuar kombit ai e ktheu në spektakël elektoral për politikën sociale.

Fjalimi i 19-të vjetor i Presidentit rus Vladimir Putin, i cili u transmetua në televizionin kombëtar dhe u shfaq në disa kinema, u mbajt më pak se tre javë përpara zgjedhjeve presidenciale, që ai me siguri do t’i fitojë.

Gjatë fjalës së tij, ai premtoi fonde për të ringjallur ekonominë dhe përshkroi planet për rigjallërimin e infrastrukturës së vendit gjatë gjashtë viteve të ardhshme.

Putini e filloi fjalimin e tij me një sërë referencash për pushtimin rus të Ukrainës, ose “operacionin special ushtarak”, siç e quan ai.

Ai tha se “ne mbështetëm vëllezërit dhe motrat tona dhe dëshirën e tyre për të qenë me Rusinë”, duke iu referuar pretendimit të shpeshtë të Kremlinit se ai e sulmoi Ukrainën për të parandaluar persekutimin e rusishtfolësve.

Ai gjithashtu aludoi për aneksimin e Krimesë nga Rusia në vitin 2014, duke vënë në dukje se ishte përvjetori i asaj që ai e quajti “Pranvera ruse”. Sipas Putinit, shumica e popullsisë ruse e mbështet aksionin ushtarak në Ukrainë.

Ai tha se trupat ruse po përparonin në një numër zonash dhe ndoshta shembulli më i dukshëm i fundit ishte tërheqja e Ukrainës nga qyteti Avdiivka.

Putini shtoi se fabrikat e mëdha, për shembull ato që prodhojnë municione, kishin kaluar në gjendje lufte dhe funksiononin gjatë gjithë kohës, në tre turne.

Ai vlerësoi gjithashtu bizneset dhe individët për mbështetjen e tyre financiare dhe më gjerë të ushtrisë ruse. Në një moment, ai mbajti një minutë heshtje në nderim të ushtarëve rusë të rënë në Ukrainë.

Putini paralajmëron rrezikun e luftës bërthamore

Putin përmendi anëtarësimin e Finlandës dhe Suedisë në NATO në kuadër të luftës në Ukrainë dhe tha se Distrikti Ushtarak Perëndimor i Rusisë duhet të forcohet. Finlanda ka një kufi të gjatë tokësor me Rusinë.

Presidenti rus tha më tej në fjalën e tij se shtetet e NATO-s rrezikojnë një luftë bërthamore nëse dërgojnë trupa në Ukrainë. Këtë deklaratë ai e bëri disa ditë pasi Presidenti francez Emmanuel Macron e la të kuptohet këtë mundësi, duke nxitur disa liderë të tjerë perëndimorë të flasin kundër kësaj ideje.

“[Kombet perëndimore] duhet të kuptojnë se ne kemi gjithashtu armë që mund të godasin objektivat në territorin e tyre”, tha Putini. “E gjithë kjo kërcënon vërtet të kalojë në konflikt me përdorimin e armëve bërthamore dhe shkatërrimin e qytetërimit. A nuk e kuptojnë ata këtë?”

Ai sugjeroi gjithashtu që politikëbërësit perëndimorë të kujtojnë fatin e liderëve historikë si Adolf Hitler (Gjermania Naziste) dhe Napoleon Bonaparte (Francë), të cilët u përpoqën pa sukses të pushtonin Rusinë. Ai tha se pasojat e një përpjekjeje të tillë sot do të ishin “shumë më tragjike” dhe akuzoi homologët e tij të NATO-s se besojnë se lufta është “një karikaturë”.

Megjithatë, Putini tha se Rusia “është e gatshme të zhvillojë dialog me Shtetet e Bashkuara të Amerikës për çështje të stabilitetit strategjik”. Me këtë ai iu referua diskutimeve për armët bërthamore, si procesi i ri START, i pezulluar nga Rusia shkurtin e kaluar.

Fjalimi i Putinit u mbajt një ditë pas kërkesës së separatistëve prorusë në rajonin separatist të Moldavisë, Transnistri, për ndihmë nga Moska për të “mbrojtur” Transnistrinë nga presioni në rritje nga Moldavia. Një kongres i posaçëm në rajon thuhet se miratoi një rezolutë mbi këtë çështje të mërkurën. Veprimet e separatistëve prorusë mund të përkeqësojnë tensionet në Moldavi dhe në rajonin e Evropës Lindore.

Presidenti 71-vjeçar e përdor shpesh fjalimin e tij vjetor për t’u dërguar mesazhe bashkëqytetarëve të tij dhe komunitetit ndërkombëtar.

Zgjedhjet presidenciale të planifikuara për 15-17 mars pritet të fokusohen në çështjet e brendshme, duke përfshirë ekonominë dhe politikën sociale. Të gjithë politikanët kryesorë të opozitës janë skualifikuar nga votimi dhe Putini duket i sigurt se do të fitojë një mandat tjetër gjashtëvjeçar.

Megjithatë, kundërshtime të vendosura u shfaqën pas vdekjes në fillim të këtij muaji të opozitarit rus Aleksej Navalni, në një koloni penale në Arktik. Kremlini ka mohuar çdo përfshirje të shtetit. Varrimi i Navalnit do të bëhet të premten në Moskë./DW/